Da Ennser Stadttrommler

Fria hat’s in uns’rer Stadt
Net geb’m nu a Gemeindeblatt,
a nu net gebm an Lautsprecher –
ham miass’n and’re Mittel her.

Da Trommler von der Stadtkapell’n
Bringt’s unter d’Leit, ganz auf de schnell’n.
Im nu san d’Bürger informiert,
des geht ruck-zuck, grad so wie g’schmiert.

Im Geist siach i eahm so wie eh
Habt-acht vorn an der Eck’n steh.
Er rührt die Trommel rum, rum, rum –
Im Nu stehng d’Leit scho umadum.

Der Friseur hat glei des Haarschneid’n lassn,
neugierig rennt er auf de Straß’n
und is a b’suners schenes Wetter,
kimmt außa a da Apotheker.

Is allwei wichtig, was ma hert:
Morg’n wird des Wasser abgesperrt.
Da Burgamasta tät halt bittn,
es war bei uns halt Brauch und Sitt’n –
ob Bürgerleit oder Verei –
hängt’s d’Fahnen auf – am 1. Mai!

De Musi macht des next Konzert,
am Muttertag – so wia sich’s g’hert.
Und nu was – d’Hund soll’n auf da Gass’n
Net überall de Trümmerl lass’n.

Nach kurzer Rede oder langa
Is er zum nächsten Strandplatz ganga.
Und wieder dröhnt des Trommel-Trum
Und wieder stengan d’Leit herum.
So bringt er s’Neueste schnell an,
er macht de guat – der liabe Mann.
I hab oft denkt – braucht’s gar net lacha,
des mecht i a amol gern macha.
War hat a Traum der Kinderzeit –
S’wurd neambt mehr macha, bei uns heit.

Herbert Golser