unheilbar!
ih hob laung nochdenggt wos ih desmoi bringa soid
a gedicht- in mundart- gibt eh scho sovü
ih kanns scho söwa nimma hern:
wia schen unsa hoamat is
wia guat dass friara war
gehst auffi am hügel
schaust owi ins toi
ih kaus nimma hern
vadaummt nu amoi
und ois soll si reima
des a nu dazua
wia wann sih im lebm irgendwas reimat
des meiste wasd erfahrst is ungereimt, manchmal sogar ziemlich ungereimt
is e a oanziga durchanaund, des gaunze lebm
owa ih soit reima- mih gfreits nimma
und wanns sowas hern woits, dann dichts eich söwa was zaum!
oiso- net bes sein, owa kaum hot oana an geburtstag, hoasts:
kunnst net was dichtn
do dat a sih gfrein
ih sitz vorm computer
und mir foit nix ein
es kummt lauta bledsinn
des wü kana hern
nur schene verserl
jo des häddns gern
Jetzt dawischi mih söwa scho wieda beim dichtn
bin ih am end kraung, hob ih a dichtvirus
kann ma des behaundln? puival gibt’s koa sagt mei dokta, owa- vielleicht hüft a kur
ih fahr auf kur- probier chi gong, tai dschi, und ying und yang
nix hüft!
am abend is daun ah nu dichtalesung und oana lest:
geh ih auffi am berg, schau ih owi ins toi…
ih moa, der is a unheilbar
owa va mia woass is wenigstns!
fm(2012)