Valorn
In de fruan fuchzga Jahr
bin ih nach Enns zogn, wirkli wahr
mit Sack und Pack, mit Kind und Kegl
auf bucklad krumme Schoddawegl
Va Freistadt wo ih friara war
woa des a Aufstieg, des war klar
samma do va da Provinz
näha zuwi zur Stadt Linz
In Freistadt, wo ih nu a Bua
da wars für uns Kinda sche
im Pregart'nteich bad'n geh'
war für uns Vagnügn gnua
Da Woid- der war glei hintan Haus
s' Vastecknspüln a Paradies
und ih moan es wird nix draus
euch zu vazöhln, wie schen' s gwen is
Oiso war ih halt in Enns
ganz ohne Freind, ih sog eich nur
des war nix schens
mehr a Tortur
De Bundesstraßn oans vorm Haus
war mir der allererste Graus
weu der Kraweu bei Tag und Nacht
hat mih fast ausn Heisl bracht
Natürli brauchts a weng a Zeit
bis oan de neiche Hoamat gfreit
und plötzlih hams a Freibad baut
da hob ih mih dann einitraut
Späda wia ih öda war
war ma im Kino, des war klar
weu Fernsehn war no net modern
war nur was für de reichan Herrn
A Hallenbad hams ah herbaut
do ham de Nachbargmeindn g'schaut
wann draussen Eiskristalle schimman
das d' Leit im warman Wassa schwimman
Hats van Wirtshaus hoam oan gschmissn
sozusagn de Haxn ausgriss'n
war oiweu gleih da erste Weg
ins Kranknhaus am Bahnhofweg
Und dort war oiweu auf da Lauer
da Herr Primar, da Dokta Gnauer
hat mit Gips bei Tag und Nacht
des Mandl wieder gehat gmacht
A so a Luxus wirkli wahr
war für de Ennser wunderbar
und jahrelang is ois guat ganga
auf oamoi hams zan sparn angfanga
Im Kino hams des Liacht odraht
de Tür zuagsperrt, na des war fad
ois nexta war des Hallenbod
wo ma in Schlüssl umdraht hot
Aus wars mit Schwimma und min Bodn
woa sowieso ka großa Schadn
hot da Burgamoasta gmant
weu mas net dazoin mehr kannt
Und jetzt haums zu guada Letzt
ah nuh des Kranknhaus vasetzt
brauch ma net weu d' Leit san gsund
oiso gibts ah goa kan Grund
so a teuas Haus zan hoitn
Einspruch sinnlos
Pappn hoitn!
Ennsa ham zu ihrem Glück
de Herrn da hohen Politk
de meistens olles bessa wissn
ih moa de hams ins Hirn nei..
da is ma jetzt des Blattl zrissn
Da fehlt a Absatz mir mitnichtn
da miassts jetzt söwa weidadichtn!
fritz.mayer 2013